Tistimunianza hè una iniziativa di Ducumintazioni è Prisirvazioni linguìstica basata in Portivechju, Corsica suttana.

I scopa principali di quista iniziativa sò

L’ughjettivu principali di l’iniziativa hè primamenti di racodda “dati di basa”ducumintendu i pràtichi linguìstichi di a cumunità Corsa.Tucchendu tandu à a racolta d’infurmazioni linguìstica è culturali rilativi à quistu pòpulu è à quidda lingua.

  • Ducumintà a lingua Corsa in a so diversità
  • Incurasgiscia a cumunità linguìstica à participà à u prughjettu
  • Crià arrighjistramenti sustinìbili è multi usi di a lingua dispunìbuli online
  • Crià un “Fundu di Risorzi” pà i scienzi suciali, a linguìstica è a cumunità linguìstica stessa

Tistimunianza incurasgisci ancu a cumunità linguistica idda stessa à piddà pussessu di a lingua, par frinà u so rinculu.

Effettivamenti, l’attitùdina di i cumunità linguìstichi in dirizzioni di i so propii lingui t’hà un rolu essenziali in u so duvintà.
I lingui à traversu a storia sò sempri stati parlati è trasmissi di manera naturali, beddu innanzi à a scrittura, l’insignamentu, a linguìstica o qualsiasi ricunniscenza istituzionali, par via di l’usu è a trasmissioni in u duminiu familiali, vettori è indicatori principali di a vitalità di una lingua.

A diversità linguistica hè essenziali pà u patrimoniu Umanu.
Ugni lingua incarna a saviezza culturali ùnica di un pòpulu. A pèrdita di qualsiasi lingua hè una pèrdita par tutta l’umanità.

Ci sarìa à pocu pressu sei milla lingui in u mondu, monda di quiddi sò oramai in prìculu.

C’hè un bisognu urgenti di ducumintazioni linguìstica, novi iniziativi pulìtichi è novi matiriali pà middurà a vitalità di ‘ssi lingui.

I sforzi di cuuparazioni di i cumunità linguìstichi, di i prufiziunali in linguìstica, di l’ ONG è di i guverni sarani essenziali pà cuntrastà stu prìculu.

C’hè un bisognu insistanti di sustena i cumunità linguìstichi in i sò sforzi pà stabilì novi roli significativi pà i so lingui amminacciati di sparizioni.

 

Una lingua hè in prìculu quandu hè in via di sparizioni. Senza una ducumintazioni adequata, un linguaghju spintu ùn pudarà mai essa rinvivitu.

Un linguaghju hè in prìculu quand’ì i so locutori cessani di aduprallu, l’adoprani in un nùmaru sempri più infimu di duminii cumunicativi,
è si fermani di passallu da una generazioni à l’ altra.

In altri paroli, ùn ci sò più novi locutori, adulti o ziteddi.

Annant’à a basa di quisti criteri, hè chjara chì a lingua Corsa hè una di quisti “cussì ditti” lingui in rìsicu d’astinzioni.

in fatti, l’UNESCO a classificheghja, sicondu i so criteri di valutazioni di a vitalità linguistica,

com’è « in prìculu crìticu”

Ùltimu passu nanzi quiddu di l’ “astinzioni”.

I vantaghja di a ducumintazioni linguìstica sò numarosi:

Pò aiutà à mantena è rivitalizà una lingua furniscendu un matiriali linguìsticu cumplettu,
risorza indispinsèvuli par qualsiasi iniziativa o pulìtica di riapprupriazioni culturali.

Com’è par asempiu a criazioni di scoli immirsivi,
Ùnicu mudellu univirsalmenti ricunnisciutu par a so efficacità in a criazioni di locutori nativi novi.

Di manera più generali, a ducumintazioni linguìstica hè ùtuli pà i studii di linguìstica, antropulugia, storia, litteratura è altri disciplini currilati.

Incù « ducumintazioni”, ci rifirimu u più suventi à a criazioni di arrighjistramenti digitali, audiò o videò.
I ricirchi di tarrenu sò sempri cundutti incù infurmatori chì t’ani u Corsu da lingua materna,
è t’hà par iscopu a racolta di “tippi di dati” ditarminati.

à sapè :
– storii
– narrativi
– cunvirsazioni
– Anàlisi annant’à punti grammaticali.

Ma più largamenti, ugni duminiu culturali indu a lingua hè aduprata.

        « Perda ugni lingua hè quant’à lampà una bomba annant’à u Louvre »


(Ken Hale, un professeur du MIT et un activiste linguiste)